Dhaqaalihi Jamhuuriyada Soomaaliyeed

Jamhuuriyadda Soomaaliyeed waxa ay xoolaha nool u dhoofin jirtay dalalka Khaliijka, muuskana Yurub. Ka sokow labadan badeeco ee aasaasiga ah, badeecadaha kale ee dalku dhoofin jiray waxa ka mid ahaa: hargaha iyo saamaha, beeyada iyo malmalka, hilibka iyo wixii hilibka ka soo baxa, iyo kalluunka iyo wixii kalluunka ka soo baxa, sida aynu ku faahfaahin doonno qaybaha soo socda ee cutubka. Sidoo kale, Jamhuuriyadda Soomaaliyeed waxa ay soo dejisan jirtay badeecado badan oo ay ka mid yihiin: raashin, shidaal, mashiinno, qalabka korontada ku shaqeeya, gaadiid, dawo iyo badeecado kale oo ay ka soo dejisan jirtay meelo kala duwan oo dunida ah.